воскресенье, 7 июля 2019 г.





Көмүстээх үрүйэ – ааҕыы күрэҕэ


                 Муус устар 24 күнүгэр Саха гимназияҕа биллиилээх суруйааччы Николай Якутскай “Көмүстээх үрүйэ” айымньытынан күрэх оонньуу үрдүк тэрээһиннээхтик ыытылынна. Сүрүн соруга – ааҕыыны көҕүлээһин. Күрэх түмүгүнэн “Бастыҥ ааҕар кылаас” уонна “Бастыҥ ааҕар дьиэ кэргэн” быһаарылыннылар.

Саха народнай суруйааччыта Николай Якутскай олоҕор, айар үлэтигэр сыһыаннаах ыйытыылары “Үйэ” сурунаалы таһаарааччы Н. Н. Кривошапкин, СӨ сибээскэ уонна информация технологиятыгар миниистири солбуйааччы Ч. Н. Гаврильев, суруйааччы, суруналыыс “Кэскил” уонна “Юность Севера” хаһыаттар сүрүн эрэдээктэрдэрэ Е. С. Иринцеева – Огдо ыыппыттара ордук кэрэхсэбиллээх буолла.
Күрэх үрдүк күүрээннээхтик, тыҥааһыннаахтык барда. Кыттааччылар бары да күүскэ бэлэмнэммиттэр. А. Г. Гуринов-Арчылан “Күрүлгэн” сурунаал эрэдээктэрэ салайааччылаах дьүүллүүр сүбэ үлэлээтэ: С. Ф. Константинова – “Бичик” С. А. Новгородов аатынан национальнай кинигэ кыһатын үөрэх уонна оҕо кинигэтигэр салаатын эрэдээктэрэ, Ч. Н. Гаврильев – миниистири солбуйааччы уонна Аида Власьевна Платонова – Оҕо уонна ыччат киинин сүрүннүүр бибилэтиэкэрэ. Күрэҕи “Кэскил” хаһыат үлэһитэ А. С. Жиркова сэргэхтик иилээн-саҕалаан ыытта.
Инньэ гынан, 8 “б” кылаас бастаата, иккис – 8 “в” ,үһүс – 8 “а”, төрдүс 8 “г” буоллулар. “Бастыҥ ааҕар дьиэ кэргэн” үрдүк ааты 8 “а” кылаастан Дьячковскайдар дьиэ кэргэн сүктэ – Степан Васильевич уонна уола Сандаар. Елисеевтар, Анисимовтар, Слепцовтар эмиэ анал ааттары ыллылар, биһирэбил бэлэхтэри туттулар, ол иһигэр Наталья Михалева-Сайа уонна Борис Павлов илии баттааһыннаах, алгыс тыллаах кинигэлэрин. Онтон “Чолбон”, “Күрүлгэн” уус уран сурунааллар эрэдээксийэлэрэ кыайыылаахтарга босхо сурутуу туоһутун туттардылар. Маннык төрөппүттэри уонна оҕолору кытары түмсүүлээх тэрээһин дьиэ кэргэнинэн кинигэни ааҕыыга улахан төһүү буолара саарбаҕа суох.
                                          


Аида Власьевна Платонова,
 Оҕо уонна ыччат киинин сүрүннүүр библитиэкэрэ,
                            дьүүллүүр сүбэ чилиэнэ