Литературнай музейга экскурсия

     Саха народнай суруйааччыта, Саха Өрөспүүбүлүкэтин П. А. Ойуунускай аатынан Судаарыстыбаннай бириэмийэтин лауреата, талааннаах литературнай кириитик Семен Андреевич Попов-Тумат быйыл, олунньу 23 күнүгэр, 75 сааһын туолла.         

         Саха народнай суруйааччыта Семен Андреевич Попов – Сэмэн Тумат 75 сааһа туолуутугар аналлаах  «Эһиги истиҥ,мин сэһэргиим!” проект чэрчитинэн  Айыы кыһатын 6 «б” кылааһын үөрэнээччилэрэ, саха литературатын учуутала Иван Иванович уонна оскуола библиотекатын сэбиэдиссэйэ Ильяда Георгиевна салайааччылаах   П.А. Ойуунускай аатынан Литературнай музейга сырыттылар.

          Кинилэри суруйааччы, литературнай критик Николай Егорович Винокуров – Урсун үөрэ –көтө көрүстэ итиэннэ биир идэлээҕин, чугастык алтыһар доҕорун биллиилээх суруйааччы Сэмэн Тумат туһунан истиҥник – иһирэхтик ахтан- санаан кэпсээтэ.“Ол курдук, суруйааччы  аҕата өссө сэрии иннинэ хоту  Булуҥҥа көһөн, Сэмэн 1944 сыллаахха Тумат арыытыгар күн сирин көрбүт. Ол эрээри Чурапчыттан төрүттээҕин-уустааҕын оҕо эрдэҕиттэн өйдүү-билэ улааппыт. Орто оскуоланы Чурапчыга бүтэрбит. Кини саха бастакы лингвист-учуонайа, саха алпаабытын, сахалыы бастакы букубаар ааптара Семен Андреевич Новгородов сиэн быраата буолар. Тус бэйэтин уус-уран айымньыларын сэргэ,  киэҥ үлэни Сэмэн Тумат, бу олоххо билигин суох саха талааннаах суруйааччыларын литературнай нэһилиэстибэлэрин пропагандалааһыҥҥа ыытар.  Уопсайа 40-ча кинигэ ааптара. Хомуйан оҥорбут кинигэтэ өссө элбэх. Кини өрөспүүбүлүкэ хаһыаттарыгар, сурунаалларыгар мэлдьи тахсар,   киэҥ ааҕааччыга санаатын тиэрдэр. Олоххо көхтөөх сыһыаннаах, үлэһит суруйааччы  үбүлүөйүн икки кинигэни таһааран көрүстэ“Повести устья Лены” (“Өлүөнэ төрдүнээҕи сэһэннэр”) диэн кинигэ “Бичиккэ”,  онтон учуонайдар,  ааҕааччылар суруйааччы  айымньыларыгар сыана быспыттарын  түмэн, “Олох биэрбит алгыһа” диэн кинигэтэ дойдутугар Чурапчыга күн сирин көрдүлэр.”- диэн кэпсээнин түмүктээтэ Николай Егорович.

 Музей научнай үлэһитэ Егор Васильевич Дохунаев музей устун сирдии сылдьан сэдэх экспонаттарга тохтоон сиһилии кэпсээтэ.  Манна оҕолор суруйааччылар туттубут малларын, сэдэх хаартыскаларын, кинигэлэрин  сөҕө – махтайа көрдүлэр. Хас биирдии суруйааччы туһунан уратыны,  кэрэхсэбиллээҕи истэн –билэн   астыныыны –дуоһуйууну  ыллылар.Саха суруйааччыларын  тустарынан билиилэрин- көрүүлэрин  хаҥаттылар.Саха народнай суруйааччыта Сэмэн Тумат олоҕун, айар үлэтин  билистилэр.

Суруйааччы Сэмэн Тумат, Чурапчытааҕы Култуура управлениетын начаалынньыга Дмитрий Попов уонна бэйиэт, кириитик, тылбаасчыт, СӨ култууратын үтүөлээх үлэһитэ Николай Винокуров-Урсун. 2019 с.

Оҕо уонна ыччат киинин сүрүннүүр специалиһа Аида Платонова