Уус уран айымньыны дьиэ кэргэҥҥэ ааҕыы

            Төрөөбүт тыл уонна сурук-бичик күнүн көрсө саха гимназиятыгар “Уус уран айымньыны дьиэ кэргэҥҥэ ааҕыы” диэн темаҕа ырытыы, анаарыы буолла. Манна саха народнай суруйааччылара Николай Егорович Мординов-Амма Аччыгыйа “Сааскы кэм”, Егор Неймохов “Бастакы хаар” уонна суруйааччы, драматург Иннокентий Дмитриев-Сиэн Чолбодук “Төлөпүөн” айымньыларын ырытыыга онус кылаас үөрэнээччилэрэ, төрөппүттэр, учууталлар кытыннылар.

                 Бу суруйааччылар айымньыларын тула кэпсэтиини саха тылын уонна литературатын учуутала Анна Федоровна иилээн-саҕалаан ыытта. Кэпсэтии киһи киһиэхэ сыһыаныгар, сиэр-майгы тула хайысхаланан барда. Суруйааччылар төрөппүттэр уонна оҕолор сыһыаннарын туһунан сытыытык суруйбуттарын ырытыы ордук киэҥник барда. Уолаттар уонна кыргыттар тус-туспа олордулар. Уолаттар бэйэлэрин санааларын хото эттилэр. Кыргыттар да хаалсыбатылар, кинилэр ордук эмоциялаахтарын биллэрдилэр. Оҕолор кинигэҕэ кэпсэммит көстүүлэри бэйэлэрин олохторун кытта ситимнээбиттэрэ ордук кэрэхсэбиллээх буолла. Аҕа көлүөнэҕэ, төрөппүттэргэ болҕомтолоох, сылаас сыһыаннаах буоларга дьулуһалларын бэлиэтээн эттилэр. Төрөппүттэр ордук иитии боппуруоһугар тохтоотулар, оҕолоругар махтаннылар, кинилэргэ эрэнэллэрин биллэрдилэр. Учууталлар дьиэ-кэргэн түмсүүлээх буоларыгар мустан олорон дорҕооннохтук кинигэни ааҕыы, дьиэтээҕи мунньахтары тэрийии олус туһалааҕын эттилэр.

         Оскуола библиотекатын сэбиэдиссэйэ Асида Михайловна суруйаачылар айымньыларынан викторина ыытта. “Кэрэ кэпсээн, сэргэх сэһэн” кинигэ быыстапката тэрээһини ситэрэн-хоторон биэрдэ. Кэпсэтиигэ эксперт “Көмүс бөрүө” хаһаайката суруналыыс Евдокия Егоровна Мостахова бэйэтин санаатын эттэ. Анна Федоровна түмүк тылыгар бу олоххо тапталынан олоруу, кинигэни аргыс оҥостуу туһалааҕын бэлиэтээтэ. Кинигэҕэ олох араас өттө ойууланан көстөр буолан, киһи элбэҕи билэрин-үөрэнэрин тоһоҕолоон эттэ.

         Маннык кинигэ тула кэпсэтии оҕолор уонна төрөппүттэр бэйэ бэйэлэрин өйдөһүүлэригэр, сомоҕолоох буолууларыгар, дьиэ кэргэҥҥэ кинигэҕэ тапталы иҥэриигэ улахан сабыдыаллааҕын этэн туран төрөппүттэр Анна Федоровнаҕа махталларын биллэрэн сибэкки дьөрбөтүн туттардылар.

      Аида Власьевна Платонова,

ССРС культуратын туйгуна,

Оҕо уонна ыччат киинин сүрүннүүр специалиһа, эксперт